Վրաստանի պաշտպանության նախարար. «Մենք ունենք իդեալական հարաբերություն և համագործակցություն»

Վրաստանի պաշտպանության նախարար Իրակլի Ղարիբաշվիլին երկօրյա պաշտոնական այցով Հայաստանում է։ Փետրվարի 27-ին նրան ընդունել է ՀՀ պաշտպանության նախարար Դավիթ Տոնոյանը։ Կնքվել է պաշտպանական ոլորտում համագործակցության 2020թ. պլանը։

Երկկողմ հանդիպումից հետո կողմերը լրատվամիջոցների համար համատեղ հայտարարություն են արել։

Նախարար Դավիթ Տոնոյանը ուրախությամբ նշել է, որ Հարավային Կովկասի երկրներից  Վրաստանի պաշտպանության նախարարն առաջինն այցելել է Հայաստան։ Տոնոյանը հայտնել է, որ ռազմական համագործակցության ծրագրում ներառված են պաշտպանական բնագավառում միջոցառումներ, ռազմական կրթության, զինծառայողների սոցիալական պաշտպանության, խաղաղապահության և լեռնային պատրաստության ոլորտները։

«Պայմանավորվածություն ձեռք բերվեց մի շարք այլ ոլորտներում համագործակցությունն ընդլայնել՝ դեռևս չներառելով մեր երկկողմանի ծրագրում։ Ցանկանում եմ հավաստիացնել, որ ՀՀ-ն ու Վրաստանը փոխադարձաբար ընկալում ու հարգում են միմյանց ժողովրդավարության ու արժեքային համակարգերը, նախապատվություններն ու ազգային անվտանգության ապահովմանն ուղղված լուծումները և ձգտում են իրենց ուրույն ներդրումն ունենալ ապագայում ավելի անվտանգ և բերեկեցիկ Հարավային Կովկասի կերտման գաղափարին»,- նշել է Դավիթ Տոնոյանը։

Վրաստանի պաշտպանության նախարար Իրակլի Ղարիբաշվիլին էլ խոսել է երկու երկրների միջև երկարամյա բարեկամական հարաբերությունների մասին, նշելով, որ հակամարտությունների խաղաղ կարգավորումն այլընտրանք չունի։

«Մենք ունենք իդեալական հարաբերություն և համագործակցություն, որն ուղված է մեր գերատեսչությունների զարգացմանը, ուժեղացմանը, համագործակցությանը»,- հայտարարել է Ղարիբաշվիլին։

Վրաստանի պաշտպանության նախարարը տեղեկացրել է նաև, որ ՀՀ ԶՈւ զինծառայողները մասնակցելու են Վրաստանում անցկացվելիք միջազգային զորավարժությանը։

«Ուզում եմ նաև նշել այն փաստը, որ հարևան, բարեկամ հայ զինծառայողները ՆԱՏՕ-ի անդամ և այլ գործընկեր երկրների հետ կմասնակցեն 2020թ. Վրաստանում անցկացվելիք վրաց-ամերիկյան Noble Partner բազմազգ զորավարժությանը»,- հավելել է Ղարիբաշվիլին։

You might also like