Երևանում ելույթ կունենա վրացական Trio Mandili խումբը

Հունիսի 10-ին առաջին անգամ Հայաստանում ելույթ կունենա հայտնի վրացական Trio Mandili խումբը: Շատերն են սիրում աղջիկների կատարումները, բայց շատ քիչ տեղեկություն ունեն նրանցից:

Երբ 2014 թվականին վրաստանցի 3 աղջիկ իրենց սիրողական վիդեոն տեղադրեցին Youtube-ում, ոչ ոք չէր էլ մտածում, որ ընդամենը մի քանի օր հետո համացանցի ուժն իրենը կանի, ու աշխարհի տարբեր ծայրերում աղջիկները հայտնի կդառնան: Նրանց բնական, մաքուր ու եռաձայն կատարումը շատերին դարձրեց վրացական երաժշտության սիրահար:

Եռյակը ներկայացել էր Trio Mandili անունով: Mandili (მანდილი) վրացերենում նշանակում է գլխաշոր: Դեռևս հին ժամանակներում Վրաստանի տարբեր շրջաններում կանայք գլխաշոր են կրել: Ըստ վրացական ավանդության՝ եթե կինը գետնին է գցել իր գլխաշորը, ապա կռվող 2 տղամարդու միջև խաղաղություն է հաստատել:

Աղջիկները հայտնի դարձան “Ապարեկա” երգով: Սա խևսուրական երգ է, Ապարեկան էլ՝ տղայի անուն: Խևսուրեթին Վրաստանի բարձրլեռնային շրջաններից մեկն է: Իր բարբառով բավական տարբերվում է դասական վրացերենից: Շատ հաճախ Վրաստանի տարբեր շրջանների բնակիչները միմյանց ամբողջությամբ հասկանալու խնդիր են ունենում: Եվ եթե Դուք էլ գիտեք վրացերեն, բայց հաճախ դժվարանում եք հասկանալ աղջիկների երգերը, ապա իմացեք, որ նրանք տարբեր շրջանների երգեր են երգում:

Հիմա մի փոքր աղջիկների մասին. երբ խումբը ձևավորվեց խմբում էին Թաթուլի Մգելաձեն (Թաթիա), Շորենա Ցիսկարաուլին և Անի Չինչարաուլին: Աղջիկները մանկության ընկերուհիներ էին ու սիրում էին միասին ժամանակ անցկացնել, հաճախ երգում էին ու նկարում իրենց: Անին նվագում էր վրացական ժողովրդական գործիք՝ փանդուրի: Հայտնի է, որ աղջիկներից Շորենան Խևսուրեթիից է: Հենց այս շրջանի երգերից խումբը շատ է կատարում: Աղջիկները երաժշտական կրթություն չունեն, ինքնուս են: Հարցազրույցներից մեկում նշել են, որ իրենց ծնողները, տատիկ-պապիկնեը երգում են, սակայն կրթություն որրպես այդպիսին չունեն, անգամ փանդուրի նվագել ինքնուրույն են սովորել:

Ձախից՝ Շորենան, կենտրոնում՝ Անին, աջից՝ Թաթիան
Ձախից՝ Շորենան, կենտրոնում՝ Անին, աջից՝ Թաթիան

Այնուհետև խմբում փոփոխություն եղավ՝ Անի Չինչարաուլիին փոխարինեց Էլենե Նարեշելաշվիլին: Հայտնի է նաև, որ խմբի աղջիկներից Շորենան  2016թ.-ին ամուսնացել է:

Շորենան, Էլենեն (կենտրոնում) և Թաթիան
Շորենան, Էլենեն (կենտրոնում) և Թաթիան
Շորենան ամուսնու՝ Գիոյի հետ
Շորենան ամուսնու՝ Գիոյի հետ

Իսկ այժմ խումբը ներկայանում է մեծապես փոխված անձնակազմով: Հին խմբից մնացել է Թաթիան, ավելացել են Թամար (Թակո/Տակո) Ծիկլաուրին և Իրինա Միդելաուրին:
Թե ինչու են փոխվել խմբի անդամները, դժվարանում ենք ասել: Ամեն դեպքում փոփոխության մասին տեղեկություն չկարողացանք գտնել:

Ձախից՝ Տակոն, կենտրոնում՝ Թաթիան, աջից՝ Իրինան
Ձախից՝ Տակոն, կենտրոնում՝ Թաթիան, աջից՝ Իրինան

Trio Mandili-ն արդեն մեկ ալբոմ ունի՝ Սիրով (With Love): Աղջիկներն այս տարի նույնիսկ փորձեցին նվաճել Վրաստանը Եվրատեսիլում ներկայացնելու պատիվը, սակայն նրանցից ուժեղ գտնվեց Տակո Գաչեչիլաձեն:

Նշենք, որ խումբը տարբեր երկրներում շրջագայելիս սովորում է այդ ազգի, երկրի  ազգային, ժողովրդական երգերից ու համերգի ընթացքում կատարում նաև դա: Հետաքրքիր է՝ Երևանում կայանալիք համերգին որ երգն են ներկայացնելու աղջիկները: Իսկ դուք ո՞րը կցանկանայիք լսել:

Նկարները՝ աղջիկների անձնական էջերից, ինչպես նաև խմբի պաշտոնական կայքից:

You might also like